Treasure New Era a gana Nos Goso 1-0 den Play off The Champions League
WILLEMSTAD - Den e promé wega di playoff entre number 1 i numbers 2 Treasure New Era a gana Nos Goso Girobank ku skor di 1-0. Den e otro wega di play-off The Champions a bati Warriors 13 pa 0.
Den un tremendo duelo di picheo, Carine Fluonia di Treasure ta gana Carlientje Cleopa di Nos Goso ku skor minimo di 1-0. Tabata Geraldine Rodriguez ku hit den bòm di ining nr 2 ku ta empuhá e úniko kareda di e tremendo wega aki. Ta bon pa menshoná tambe e tremendo aktuashon di Betzabeth Rasmijn den centerfield pa e ekipo di Treasure New Era. Ku e viktoria aki Treasure New Era ta pika dilanti den e serie aki ku ta mihó di 3. E ganadó di e serie aki lo pasa direktamente pa e gran final.
Treasure 1 kareda, 5 hit, 1 eror. Carine Fluonia a gana. Mihó na bate Geraldine Rodriguez di 2-1. Pa Nos Goso 0 kareda, 5 hit, 0 eror. Carlientje Cleopa a pèrdè. Girella Isabella di 3-2.
Den e serie mihó di 3 entre nr 3 i nr 4, The Champions ta gana e ekipo Warriors ku skor di 13 - 0.
The Champions den e wega aki a bati 13 hit i hunga sin eror. Picher ganadó Anelka Baromeo. Na bate Soraida Juliana di 3-3 i Angelica van Putten di 2-2. Warrios a bati únikamente 2 hit i hasi 5 eror.
Picher pèrdèdó Solange de Windt. Mihó na bate Nuria Garrido di 2-2. E pèrdèdó di e serie aki ta eliminá i e ganadó ta sigui den kontienda i lo enfrentá e pèrdèdó di e serie entre nr 1(Treasure) i nr 2 (Nos Goso).
