Spin Lourens ta permiti un hit so i ta blankia StaRosa Memories 6 pa 0
WILLEMSTAD - Spin Lourens tabata hermetiko riba montikulo i a permiti apenas un hit na e bateadornan di Sta. Rosa Memories pa blankianan ku skor di 6 pa 0. Na bate Jefrey Martina den gran forma a bai di 3- 3 ku dos doblete empuhando tres kareda pa asina tambe yuda su ekipo logra e viktoria.
Pa The Bears 6 kareda 9 hit i 0 eror. Picher ganado Sedeney Spin Lourens. Miho bate Jefrey Martina di 3 – 3. Pa Sta Rosa 0 kareda 1 hit i 3 eror. Picher perdedo Momon Martina. Miho bate Lindon Pitufo Lourens di 2 – 1. Mester bisa ku te ainda e pichernan di The Bears no a permiti niun kareda kontra tantu den semifinal komo final.
Pues The Bears tin 3 wega hunga sigui sin permiti e tim kontrali hinka kareda. E picheo di The Bears ta un kos serio den final di beisbol veterano.
Prome ku wega tabatin un seremonia kaminda Boy Evertsz na kende huntu ku Gibi Coffie e kampionato ta ser dedika a entrega na nomber di Beveko un rekuerdo na kada hungado di e dos ekiponan komo muestra ku nan ta partisipando na final di beisbol veterano.
Hopi biaha ta duna kopa na e ekipo kampion i sub kampion pero e hungado mes no ta keda ku un rekuerdo ku ela hunga final. Ta p’esei e aña aki Beveko a inklui un premio individual tambe pa kada hungado ku ta hungando final. Final ta sigui Djasabra awor 11 di desember pa 3 or na velt Vi Jansen ku e di dos wega entre Sta Rosa Memories i The Bears.
Sta Rosa ta lomba kanti muraya i mester gana pa forsa un di tres partido. Si The Bears gana anto nan lo bira kampion di beisbol veterano pa aña 2010. Korda yega na tempu. Radio Hoyer tambe lo tei presente ku transmishon bibu direkto for di velt Vi Jansen na kolebra berde.
