Kustwacht i Klínika Capriles a gana den Torneo Isla
WILLEMSTAD - Kustwacht a dal CIS fásil 12 pa 1 i despues Klínika Capriles a zona Omni 12 pa 8. Bon públiko djaweps 12 di yanüari pa mira e weganan den Stadion Post 6.
Awe tin dos wega. Den e promé partido e ekipo MCB lo debutá kontra Building Depot i despues lo sigi Kooyman vs Haf.
Nos a risibi un komunikado di e PR di e torneo ku ta Luigi Yanez.
“Despues di un ousensia chiki asina…..mi tei bek.
Manera bosnan sa kaba
Torneo Isla ta a la karga i weganan a kontinuá ayera nochi. Kustwacht a sali brabu brabu den nan promé wega i laga sa ku nan tei zowel riba awa komo riba tera.Nan a tira un inval den e kompania CIS mesora.
Klinika Capriles tambe a bin ku un ofensiva style di hopi skuma ( hit) i tiki chukulati ( kareda) pero nan a sali for di porta grandi tòg.
Omni di Jolly Juliana i Lebe Lebe Duggan a pasa mesora den kuido intensivo (2 pèrdí).”, esaki ta loke Luigi Yanez a sita den su komunikado.
Torneo Refineria Isla ta sigi e wikènt aki ku varios wega kandela. Ekiponan grandi manera Flow i UTS/TDS ta debutá e siman aki.
