Bulldogs a gana dos wega den wikènt i klasifiká na puesto number 4 den Beisbòl Veterano
WILLEMSTAD - Bulldogs di Denley Marten a gana Quality Stars djasabra i derotá Santa Maria Pirates djadumingu pa klasifiká komo ekipo number 4 den e kampionato di Beisbòl Veterano 2011.
Djasabra Hensley Josephina tabata e picher habridó pa Bulldogs. Hensley no tabatin un bon salida i a tuma 3 kareda den promé inning i 4 kareda den inning number 2. Josephina a haña bon respaldo di bateo di su ekipo i a rekuperá i mantené su ekipo den bataya. E wega a terminá ku skor di 17-7. Randolph Mercera tabata e picher pèrdèdó pa e ekipo Quality Stars.
SANTA MARIA
Den e otro deskite Santa Maria Pirates a gana Azucar ku skor di 7 pa 3 djasabra.
Arthur Bonevacia a tira wega kompletu pa Santa Maria djasabra miéntras Franklin Leuteria, Raymond Zoerka i Revelino Moesker tabata a lansadónan pa Azucar.
BULLDOGS
Ayera Elroy ‘Roy’ Philips tabata tremendo riba montíkulo pa e ekipo Bulldogs gana Santa Maria 8 pa 2.
Bulldogs a demostrá un ofensiva bárbaro durante e dos weganan di e wikent.
Bulldogs lo enfrentá The Bears i Santa Rosa lo topa Vosama e wikènt aki na Vi Jansen Ballpark.
