Hope Softball Tournament 2012 dediká na Ronald Mc.Donald House Charities Curaçao Foundation
WILLEMSTAD - Komishon Pa Atletanan di Maduro & Curiel’s Bank (KOMPA) pa di dos aña konsekutivo ta organisá “HOPE Softball Tournament”. E palabra HOPE ta para pa “Helping Others Persevere & Excel”.
E meta prinsipal di e torneo di Sòftbòl Slowpitch Komersial i Sosial aki ta pa yuda generá fondo pa orga-nisashonnan ku tin mester di e esaki por sigui yuda nan miembronan pa nan sigui perserverá i sigui sobresalí positivamente den tur loke nan ta hasi. Aparte di yuda krea fondo, “HOPE Softball Tournament” ta duna tambe hopi empleado di un kompania e oportunidat di hasi deporte huntu ku nan koleganan i asina traha riba “team building” i alabes sera mas amistat ku empleadonan di e otro kompanianan.
Na 2011 HOPE Softball Tournament tabata dediká na “Special Olympics Curaçao” i danki na e tur e sòftbòlistanan i e fanátikonan, a logra generá Naf. 20.000,— pa e organisashon di “Special Olympics Curaçao”. E aña aki KOMPA ta dediká HOPE Softball Tournament na “Ronald Mc.Donald House Charities Curaçao Foundation” (RMHC). Gran mayoria parti di e nèto ganashi di benta di bar i
kushina di “HOPE Softball Tournament” lo keda entregá na RMHC.
Sra. Claudia Rigaud ku ta miembro di direktiva di RMHC a duna un splikashon kòrtiku pa mas hende por komprondé kiko nan Fundashon ta para p’e : “RMHC a wòrdu fundá Desèmber 2009 i e mishon di e fundashon ta pa yuda krea, buska i sostené programanan ku ta dirigí direktamente na drecha salú i bienestar general di mucha. RMHC ke hasi esaki dor di introdusí un di nan promé programanan, ku ta e konsepto di un Ronald Mc.Donald Family Room den hospital Sint Elisabeth (SEHOS) ku ta un invershon di alrededor di Naf. 200.000,—.
E sala aki tin komo meta pa trese famianan huntu durante nan momentonan difísil pa asina mayornan por ta serka di nan yu malu. Aparte di e esaki RMHC mester siguí
generá fondo pa manehá e sala i sigui duna e servisio na tur mayor i pashèntnan ku ta hasi uso di “Ronald McDonald Family Room” tur dia di nobo. Esaki ta nifiká ku mas fondo Atletanan di Maduro & Curiel’s Bank, sòftbòlistanan i fanátikonan logra generá durante di “HOPE Softball Tournament” pa RMHC, mas mucha i mayor nan por yuda hasi felis”.
Tambe Atletanan di Maduro & Curiel’s Bank ta spera ku e echo ku a dediká “HOPE Softball Tournament” na RMHC, ta yuda krea kon-sientisashon pa mas tantu hende posibel haña sa di e eksistensia i nesesidatnan di e organisashon i pa mas hende den nos komunidat saka un man i sigui yuda nos muchanan.
Atletanan di Maduro & Curiel’s Bank na nòmber di tur e 1000 sòftbòlista ku ta bai forma parti di “HOPE Softball Tournament 2012” i Direktiva di RMHC ta invitá tur e empleadonan di e kompanianan ku ta partisipá den HOPE Softball Tournament i fanátikonan di sòftbòl komersial pa bishitá e weganan ku ta kuminsá dia 23 di Mart i terminá 30 di Aprel na Suvek Ballpark pa asina boso tambe yuda kontribuí na un bon kousa.
Alabes Direktiva di KOMPA ta gradisí tur e spònsernan ku ta yuda pa hasi “HOPE Softball Tournament” eksitoso; Maduro & Curiel’s Bank (spònser prinsipal), De Jongh’s Sporthuis, Curaçao Beverage Bottling Co. BV i Distribier.
